Битолската Зоолошка градина денеска организираше презентација на Националната Стратегија за Зоолошки градини. Експрети, претставници од релевантни институции, градоначалникот на Битола, претседателот на Советот, советници и други гости беа дел од оваа презентација која има за цел остварување на неколку цели кои пак ќе не усогласат и со директивите на Европската унија.
Стратегијата е изработена со поддршка од Министерството за животна средина и просторно планирање.
„Главната цел на стратегијата е да се создаде еден план за развој на зоолошките градини. Самата стратегија е насочена кон создавање на еден интегриран пристап во развивањето на зоолошките градини. Главната идеја и насока е да се имплементира европската регулатива во однос на ЗОО директивата, а и покрај тоа да се постигне едно повисоко ниво и повисоки стандарди на одгледување и грижа за животните и промоција на природата, заштитата на биодиверзитетот и градење на една едукативна и јавна свест“ рече проф. д-р Мирослав Ќосевски од Факултетот за ветеринарна медицина во Скопје .
Стратегијата е направена врз основа на длабинска анализа на зоолошките градини во Битола и Скопје.
„Зоолошките градини не треба да се изложбени центри, во суштина и оваа стратегија со акцискиот план во следните пет години нуди една трансформација од изложбено место на животни, кон едукација и пред се заштита особено на заштитени диви видови кои ги имаме и во нашата земја“ рече Богољуб Стерјовски, назависен консултант за заштита на видови и конзервација.
Градоначалникот на Битола, Тони Коњановски кажа дека Општина Битола на вториот повик на Владата аплицираше и беше одобрен проектот преку министерството за култура и туризам за изградба на објект на Терариум и објект на Копитари.
Изградбата на ново живеалиште за копитари е во вредност од 9.634.336 денари, а изградба на современ терариум во вредност од 8.994.667 денари.
„Овие инвестиции се дел од заложбите на Општина Битола за подобрување на условите во Зоолошката градина, создавање на современ простор за животните и овозможување на поквалитетно, едукативно и забавно искуство за сите посетители“ рече Коњановски.
Како Општина продолжуваме да вложуваме и да се грижиме за зоолошката градина, рече градоначалникот на Битола.
