Министерката за финансии Гордана Димитриеска Кочоска заедно со премиерот Христијан Мицкоски и членовите на Владата оствари средба со амбасадорите на земјите членки на Европската Унија, на која се разговараше за спроведувањето на Реформската агенда.
На средбата беше истакната клучната улога на Министерството за финансии во реализацијата на Реформската агенда 2024–2027, особено во делот на управувањето со јавните финансии, буџетските реформи и јавните инвестиции.
Димитриеска Кочоска посочи дека усвојувањето на Законот за системот на внатрешна финансиска контрола, имплементацијата на Законот за буџети со 17 подзаконски акти, воспоставувањето на регистар на јавни субјекти и ревизијата на буџетските класификации се конкретни чекори кои веќе даваат видливи резултати. Со овие реформи, бројот на буџетски корисници е намален од 100 на 35, со што се зголемува ефикасноста и транспарентноста во трошењето на јавните средства.
Министерката нагласи дека Министерството за финансии продолжува со силен фокус на одговорно, транспарентно и ефикасно управување со јавните финансии, како клучен предуслов за економска стабилност и напредок на европскиот пат на државата.
