Министерот за надворешни работи и надворешна трговија, Тимчо Муцунски, денеска учествуваше на Светскиот самит за влади во Дубаи, каде говореше на панел-дискусијата посветена на новиот логистички поредок. Муцунски ја истакна стратешката позиција на Македонија како единствена држава во регионот каде се вкрстуваат двата клучни европски коридори.
Денеска во Дубаи, во рамки на Светскиот самит за влади, бев говорник на панел-дискусијата „ Следниот логистички поредок: Што мора да се промени?“. Во денешниот глобален политички пејзаж единственото што е предвидливо е непредвидливоста, па затоа наместо да реагираме само кога ќе се појават предизвици, неопходно е да градиме долгорочна способност за адаптација, рече Муцунски.
Муцунски нагласи дека диверзификацијата е клучна алатка за управување со ризици – да не зависиме исклучиво од една индустрија, рута или пазар.
„Потребни се поинтензивен меѓувладин дијалог, побрзи одговори на глобалните предизвици и политики што ќе создадат услови бизнисите да бидат поефикасни, поконкурентни и подготвени за раст. Бизнис-заедницата бара поедноставени процедури, брзина и предвидливост, а примерите од Обединетите Арапски Емирати потврдуваат дека прилагодливото законодавство и современите административни алатки директно го поддржуваат економскиот развој“, посочи министерот.
Муцунски говореше и за стратешката позиција на нашата држава како единствена во регионот каде се вкрстуваат Коридорите 8 и 10 – значајна развојна предност.
„Затоа активно инвестираме во енергетската безбедност и поврзаноста, вклучително и преку интерконекторите со Грција и Србија. Диверзификацијата, силната инфраструктура и јасното разбирање на нашата улога во регионалните и глобалните текови се темел за долгорочна економска стабилност и просперитет“, истакна Муцунски.
Извор: zurnal.mk
