Судија на претходна постапка при Основниот кривичен суд Скопје, постапувајќи по предлог на Основното јавно обвинителство за гонење организиран криминал и корупција, донесе решение со кое на осомничениот апелацискиот судија Ѓ.Р. му се определува мерка куќен притвор, како и дополнителна мерка за обезбедување присуство – одземање на патната исправа и забрана за издавање нова.
-Судија на претходна постапка при Основниот кривичен суд Скопје, постапувајќи по предлог на Основното јавно обвинителство за гонење организиран криминал и корупција, за определување мерки за обезбедување присуство и мерки за претпазливост против Ѓ.Р. , по произнесување на осомничениот и надлежниот јавен обвинител, донесе решение со кое предлогот на ОЈО се прифаќа и на осомничениот му се определува мерка куќен притвор како и дополнителна мерка за обезбедување присуство, односно одземање на патна исправа и забрана за издавање нова, се наведува во соопштението од Основен кривичен суд Скопје.
Со оглед на тоа што осомничениот е апелациски судија и се товари за кривичните дела „перење пари и други приноси од казниво дело“ по член 273 став 1 и „противправно стекнување и прикривање имот“ по член 359 – а став 3 вв став 1 од Кривичниот законик, Судот претходно го доставил предлогот до надлежниот Судски совет на Република Македонија, кој одлучувал за одземање на судискиот имунитет. По добиената согласност од Судскиот совет, Судот го прифатил предлогот на ОЈО ГОКК.
Против ова решението странките имаат право на жалба пред Кривичниот совет, велат од Основниот кривичен суд Скопје.
Извор: kurir.mk
