Во Техеран, главниот град на Иран се одржа голема погребна поворка за припадници на безбедносните сили и цивили убиени за време на последните немири, кои властите ги припишуваат на „терористи“.
На погребната церемонија присуствуваа високи функционери, меѓу кои и министерот за надворешни работи Сејед Абас Арагчи, како и граѓани кои носеа национални знамиња и фотографии од врховниот лидер Али Хамнеи и од жртвите.
„Луѓето излегоа да протестираат против економската состојба во земјата. За жал, непријателите ја искористија оваа ситуација и затоа граѓаните бараат најстроги казни за економската корупција.“, вели жителка.
„Сите протестираат против условите, но никој од народот не е задоволен кога се оштетува јавниот и приватниот имот или кога се загрозува безбедноста. Мислам дека овие последни инциденти не се дело на обични луѓе.“, вели жител.
Iran International објави дека најмалку 12.000 лица се убиени во последните протести, но иранското судство го отфрли ова тврдење како „лажно и нереално“, обвинувајќи ги медиумите за фабрикување бројки, без притоа да даде официјални податоци за бројот на жртвите.
Иранските власти во средата сигнализираа дека се очекуваат брзи судски постапки и егзекуции за осомничените приведени за време на националните протести, додека Иран најави одмазда доколку САД или Израел интервенираат во внатрешните немири.
Претседателот на САД, Доналд Трамп, изјави дека од „важни извори“ бил информиран дека планираните егзекуции во Иран се запрени, без да даде дополнителни детали. Останува нејасно дали неговите коментари значат откажување од евентуални американски дејства кон Иран. Трамп не прецизираше како би реагирале САД.
„Ќе видиме и ќе следиме каков е процесот, но добивме многу добра изјава од луѓе кои се запознаени со тоа што се случува. Кога тие велат ‘нема егзекуции’, сите зборуваа дека денес ќе има многу егзекуции. Нè информираа дека нема да има егзекуции. Се надевам дека тоа е точно. Ова е голема работа.“, рече Доналд Трамп
Иранскиот министер за надворешни работи, Абас Арагчи, исто така се обиде да ја ублажи реториката, повикувајќи ги САД да најдат решение преку преговори.
„Мојата порака е: меѓу војната и дипломатијата, дипломатијата е подобриот пат. Иако немаме позитивно искуство со Соединетите Американски Држави, сепак дипломатијата е многу подобра од војната. Но одлуката е на претседателот на САД.“, вели Абас Арагчи.
Промената на тонот од страна на САД и Иран дојде неколку часа откако шефот на иранското судство изјави дека владата мора брзо да дејствува за да ги казни илјадниците приведени, вклучително и со забрзување на егзекуциите. Протестите избувнаа од крајот на минатиот месец во неколку ирански градови поради силното обезвреднување на националната валута – риалот. Иранските власти изјавија дека се подготвени да ги адресираат економските поплаки, но истовремено предупредија против насилство, вандализам и немири.
Извор: tv21
