Густи облаци солзавец го покриваат историскиот Голем пазар во Техеран, додека демонстрантите се обидуваат да ја напуштат областа. Безбедносните сили употребија солзавец за да ги растераат демонстрантите.
Истиот ден, иранското разузнавање соопшти дека уапсило клучни лица осомничени за организирање на немирите.
Иранската државна телевизија за првпат го призна високиот број жртви, цитирајќи функционер кој изјави дека има „голем број маченици“. Активистите известуваат за над 2.000 загинати, додека Агенцијата за вести на активистите за човекови права, со седиште во САД, пријави 2.003 жртви.
Десетици илјади луѓе учествуваа на масовниот погреб во близина на Универзитетот во Техеран. Ковчезите, покриени со знамиња и цвеќиња, беа поставени на камиони. Толпата извикуваше и се удираше во градите, додека церемонијата беше пренесувана во живо. Државната телевизија објави 300 ковчези, но новинарите на АП забележаа околу 100.
Претседателот на САД Доналд Трамп во вторникот изјави дека ги откажал „сите средби“ со ирански официјални лица. Тој ги повика Иранците да продолжат со протестите и рече дека „помошта доаѓа“, без да даде дополнителни детали. Трамп исто така изјави дека ќе „дејствува согласно ситуацијата“.
„Пораката е дека тие треба да покажат човечност, имаат голем проблем и се надевам дека не убиваат луѓе, а јас наскоро ќе добијам извештај. Ми се чини дека се однесувале лошо, но тоа сè уште не е потврдено.“, вели Доналд Трамп.
Централната команда на САД (CENTCOM) соопшти дека отворила нова оперативна ќелија за воздушна одбрана во базата Ал Удеид во Катар, со цел зајакнување на воздушната и ракетната одбрана. Министерот за одбрана на Иран, Азиз Насирзаде, предупреди дека Иран ќе одговори решително на секој нов чин на агресија и дека земјите кои помагаат на САД ќе станат легитимна цел.
Извор: tv21
