Обилните снежни врнежи го претворија главниот град на БиХ, Сараево во бајковит пејзаж. Еден млад човек го искористи ова, исполнувајќи го својот сон да скија на главната улица во градот. Тој го привлече вниманието на минувачите со својот спонтан скијачки спектакл, јавува „Дневни аваз“.
Скијањето на булеварот предизвика радост кај минувачите, кои го забележаа овој необичен момент со своите мобилни телефони и го споделија на социјалните мрежи. Повеќето реакции беа полни со восхит, додека многумина рекоа дека оваа позитивна атмосфера им го разубавила денот.
Момчето, кое беше казнето со 200 евра за загрозување на безбедноста во сообраќајот, рече дека сака да ја сподели својата љубов кон зимските спортови на начин што ќе ги насмее другите и ќе ги инспирира.
„Не можете да им го објасните животот на мртвите. Исто како што не можете да им објасните на некои луѓе дека автомобилите не забавиле поради мене – туку јас забавив поради нив. Ова видео е во спротивност со она што го велат медиумите, дека го забавив сообраќајот. Да, беше опасно. Но, од моја перспектива – воопшто не. Цел живот скијам професионално и точно знам каде ми се границите. Ова не беше лудост, туку акција контролирана од искуство. Го објавувам дури сега затоа што целта никогаш не била Инстаграм, прегледи или внимание. Ова беше сон на едно момче што се оствари еднаш во животот“, изјави Бенџамин Годињак.
Извор: tv21
