Се подготвува нов закон за заштита од пушењето, со кој се предвидува драстично заострување на државната политика кон пушењето цигари, но и воопшто кон тутунските производи, објави денеска ТВ Телма.
Според нацрт-законот до кој дошла телевизијата, забраната за пушење ќе важи во сите затворени простори од јавен карактер, а увозот и продажбата на тутунски и никотински производи драстично ќе се ограничи.
Цигарите ќе се тргнат и од видното поле на купувачите во маркетите, а се предвидуваат и ригорозни правила во сите затворени јавни институции.
„Забраната ќе важи за сите угостителски објекти за храна, вклучувајќи ресторани, барови, меани, кантини“, пренесува ТВ Телма.
Пушењето, според одредбите на законот, ќе биде забрането и на терасите на кафеаните, доколку тие не се целосно отворени од најмалку три страни.
Една од најважните измени е забрана за пушење во автомобил, доколку во моментот има присуство на дете, како и на автобуски и железнички станици, на пазари и во редица други институции и на јавни простори.
Истата забрана со новиот предлог-закон ќе важи и за сите типови на електронски цигари и вејп-уреди, а дополнително се забранува и користење на ароматизирани цигари.
Како што пренесува Телма, Министерството за здравство како креатор на овие измени, смета дека истите се неопходни, а целта е да се спречи здравствена катастрофа.
Предложените измени на законот за заштита од пушењето наскоро треба да бидат понудени на јавна дебата.
Според податоците на институциите, во земјава цигари пушат над 45 отсто од возрасните луѓее, што е далеку над просекот на Европа. Половина од нив пушат по една кутија цигари дневно.
Извор: kurir.mk
