Потрагата по 16-годишниот Ахиле Барози трае од новогодишната ноќ, откако младиот Италијанец се вратил во клубот „Le Constellation“ за да ги земе своите лични работи. Според Би-Би-Си, тој влегол во клубот околу 1:30 часот по полноќ за да ја земе јакната и мобилниот телефон, по што семејството повеќе нема никакви информации за него.
Неговото семејство минува низ вистинска агонија. „Не знаеме каде е Ахиле. Се надеваме дека е во некоја од болниците“, изјави неговата тетка Франческа за Би-Би-Си.
„Не знаеме дали е сè уште жив“, додаде таа, опишувајќи го својот внук како прекрасно дете и талентиран сликар кој посетувал уметничко училиште во Милано.
„Само сакаме да го пронајдеме, тоа е сè“, порача очајната тетка.
Во меѓувреме, швајцарските власти соопштија дека формалната идентификација на загинатите и повредените сè уште е во тек.
Полицискиот командант Фредерик Гислер потврди дека досега се официјално идентификувани 113 од вкупно 119 повредени лица, додека постапката за идентификација на преостанатите шест сè уште трае. Меѓу идентификуваните има 71 швајцарски државјанин, 14 француски, 11 италијански, четири српски, еден државјанин на Босна и Херцеговина, еден Белгиец, како и по еден државјанин на Луксембург, Полска и Португалија.
Претседателот на кантоналната влада, Матијас Рејнард, изјави дека бројот на загинати во пожарот и понатаму се проценува на околу 40 лица. Началникот на швајцарската правосудна полиција, Пјер-Антоан Ленжен, нагласи дека продолжува официјалната идентификација на жртвите, што во моментов претставува „апсолутен приоритет“.
„Не смеат да се дозволат грешки. Мораме на семејствата да им ги вратиме точните посмртни останки“, изјави Ленжен.
Првата официјално идентификувана жртва е Италијанецот Емануеле Галепини, 16-годишен меѓународен голфер кој живеел во Дубаи. Властите предупредија дека идентификацијата на жртвите и утврдувањето на конечниот број загинати ќе потрае, бидејќи многу од телата се тешко изгорени.
Да потсетиме, пожарот избувна во четвртокот околу 1:30 часот по полноќ во барот „Constellation“ во Кранс-Монтана, популарна туристичка дестинација, особено меѓу младите кои ја славеле Новата година. Бројот на лица присутни во барот, кој се простира на два ката и според официјалната веб-страница има капацитет од најмалку 300 лица, сè уште не е официјално потврден, но се претпоставува дека во моментот на пожарот имало околу 200 гости.
Повредените се пренесени во повеќе болници, меѓу кои и во Лозана, Женева и Цирих, како и во соседна Франција и Италија.
Извор: tv21
