Фудбалските кругови на островот шират вести кои, доколку се остварат, би можеле да одекнат како бомба. Жозе Мурињо наводно е отворен за враќање на клупата на Челзи. Откако Енцо Мареска беше отпуштен поради низа лоши резултати, лондонскиот клуб бара ново решение, а името „Специјалниот“ повторно е во игра.
Иако неговото име моментално не се споменува меѓу официјалните кандидати на Стемфорд Бриџ, извештаите сугерираат дека Мурињо е подготвен да ја напушти клупата на Бенфика без многу размислување и да се врати во Лондон доколку дојде вистинскиот повик.
Мурињо го водеше Челзи во два наврати. Тој првпат пристигна во 2004 година и, во соработка со Роман Абрамович, го врати клубот на врвот на англискиот фудбал по половина век чекање, пред да замине во 2007 година. Неговиот втор мандат започна во 2013 година и заврши во зимата 2015 година по падот на резултатите. Во синиот дел од Лондон, тој освои три титули во Премиер-лигата, ФА Купот, три Лига Купа и Комјунити Шилд.
Португалскиот стручњак ја започна сезоната на клупата на Фенербахче, но брзо беше отпуштен, а потоа ја презеде Бенфика, клубот каде што ја започна својата тренерска кариера. Тој ја изгради својата кариера и во Порто, Интер, Реал Мадрид, Манчестер Јунајтед, Тотенхем и Рома.
Извор: vecer.mk
