Дел од тешко повредените лица во смртоносниот пожар што избувна во новогодишната ноќ во швајцарскиот скијачки центар Кран-Монтана најверојатно ќе бидат префрлени на лекување во соседни земји, поради ограничените капацитети за третман на тешки изгореници во Швајцарија. Ова го изјави претседателот на регионалната влада на кантонот Вале, Матијас Рејнард.
Претседателот на Швајцарскиот федерален совет, Ги Пармелен, изјави дека во наредните денови фокусот ќе биде ставен на згрижување на најтешките случаи. „Целта е да бидеме ефикасни и да обезбедиме спасување на што е можно повеќе животи“, нагласи Пармелен.
Причината за пожарот сè уште се истражува, а многу околности остануваат нејасни. Кантоналната државна обвинителка на Вале, Беатрис Пилу, изјави дека е прерано да се потврди дали во барот биле користени шишиња со пиротехнички прскалки. Таа посочи дека истрагата ќе утврди дали биле почитувани безбедносните и противпожарните стандарди, при што напомена дека скалиштето во објектот изгледало релативно тесно.
Командантот на полицијата на кантонот Вале, Фредерик Гислер, изјави дека не може да се исклучи можноста меѓу жртвите да има и странски државјани, но дека во овој момент нема потврдени податоци за нивниот идентитет и државјанство.
Во меѓувреме, Италија соопшти дека бројот на загинати се проценува на најмалку 47 лица, а по дел од лицата сè уште се трага. Италијанскиот министер за надворешни работи, Антонио Тајани, изјави дека меѓу 12 и 15 италијански државјани се хоспитализирани по пожарот, додека ист број лица се водат како исчезнати.
Тајани најави дека центарот за лекување на тешки изгореници во Нигуарда, во близина на Милано, ќе прими три тешко повредени лица од Швајцарија, кои ќе бидат транспортирани со хеликоптери од Ломбардија. Според него, овој потег е гест на солидарност и има за цел да се намали притисокот врз швајцарскиот здравствен систем, нагласувајќи дека засега не е познато дали повредените што ќе пристигнат во Италија се италијански државјани.
Извор: tv21
