Првиот црногорски сателит „Луча“ беше успешно лансиран во ниската Земјина орбита (LEO) во неделата со ракета Сојуз, од космодромот Восточни, во близина на границата меѓу Русија и Кина.
Како што објави директорот на организацијата „Вселенски истражувања на Црна Гора“ (MSR), Филип Јовиќевиќ, со тој чин Црна Гора напиша ново поглавје во својата технолошка и научна историја. Тој додаде дека ова е само почеток и дека „Вселенските истражувања на Црна Гора“ се свртуваат кон уште поамбициозна цел – развој на првата црногорска ракета, прво суборбитална, а потоа и орбитална.
„Убеден сум дека тимот собран околу оваа организација има знаење, капацитет и визија за да ја постигне оваа цел, што би претставувало најголем технолошки пробив во историјата на Црна Гора. Паралелно, ќе продолжиме силно да ја промовираме науката, технологијата и инженерството меѓу сите возрасти, бидејќи само преку знаење можеме да изградиме генерации инженери кои ќе продолжат да ја развиваат црногорската вселенска програма“, рече Јовиќевиќ.
Примарната мисија на сателитот е да мери космичко зрачење. Покрај тоа, сателитот е опремен со камера што ќе снима визуелни снимки од висина од околу 600 километри, како и телекомуникациски системи за пренос на податоци до Земјата.
Како мал сателит во секундарниот товар на ракетата „Сојуз“, Луча го симболизира првиот национален сателит на Црна Гора кој технолошки, законски и оперативно е управуван од самата држава.
Сателитот е развиен од организацијата „Montenegro Space Research“, непрофитна иницијатива што ги здружува црногорските инженери и научници со цел развој на вселенски технологии, едукација на млади луѓе и градење национална вселенска програма.
Фото: Космодром Восточни, илустрација
Извор: vecer.mk
