Илјадници демонстранти од цела Албанија во Тирана на антивладин протест организиран од главната опозициска Демократска партија. Инциденти и тензии пред зградата на владата на булеварот Deshmoret e Kombit.
Организаторите бараат оставка од премиерот Еди Рама и од вицепремиерката Белинда Балука, која е и министерка за инфраструктура и енергетика. Демократската партија тврди дека причината за протестот се случаи на корупција.
Демонстрантите истакнуваат дека Белинда Балуку е обвинета за кршење на рамноправноста на учесниците во тендери и јавни аукции. Затоа, Специјалното обвинителство за борба против корупцијата и организираниот криминал (СПАК) побара од парламентот да го одземе нејзиниот пратенички имунитет за да се овозможи нејзино апсење.
Бериша: Ќе ја спасиме Албанија
Претседателот на Демократската партија (ПД), Сали Бериша, се обрати на толпата, велејќи дека опозицијата исполнила неколку големи обврски кон граѓаните.
„ПД останува решена да соработува со секој фактор, со секој граѓанин и со секоја политичка сила на најширокиот фронт што Албанија некогаш го видела. Имајте доверба дека, исто како што ја спасивме опозицијата кога сакаа да ја уништат, така ќе ја спасиме и Албанија, ќе ги спасиме Албанците и ќе им го дадеме местото што го заслужуваат“, рече Бериша.
Тој ги повика сите опозициски сили да се обединат во борбата.
По говорот на Бериша, ситуацијата ескалираше. Избувнаа судири меѓу демонстрантите и полицијата, а неколку молотови коктели беа фрлени врз зградата на владата.
Накратко избувна пожар од надворешната страна на зградата, а неколку лица беа повредени во немирите.
Демократската партија и другите опозициски партии најавија дека ќе продолжат со протестите во наредните недели.
Извор: vecer.mk
