Лажниот лек оксикодон, кој се продавал преку интернет, уби најмалку 13 лица во Холандија и предизвика десетици сериозни труења, според истрагата спроведена од болницата „Еразмус МЦ“ на барање на холандскиот јавен радиодифузен сервис НОС.
Вистинскиот лек е оксикодон, силен опиоиден аналгетик, кој инаку е достапен и со рецепт.
Холандскиот форензички институт потврди шест смртни случаи и четири сериозни труења поврзани со лажни лекови, објавува порталот „НЛ Тајмс“.
Институтот се сомнева во уште шест смртни случаи, додека во еден случај има силни индикации за поврзаност.
Најмалку 22 лица преживеале тешко труење, некои по интензивен третман, а експертите предупредуваат дека овие бројки веројатно го потценуваат вистинскиот обем на проблемот.
Повеќето од жртвите земале лажен оксикодон купен од онлајн продавницата Slaappillen.net.
Тапчињата содржеле нитазен, исклучително моќен синтетички опиоид кој може да предизвика фатални предозирања.
Двајца мажи поврзани со веб-страницата треба да се појават на суд во понеделник по обвинение за трговија со дрога по смртта на 44-годишната Шерон, од Форбург.
Досега, обвинителството не ги поврзало директно со ниедна смрт, додека главните осомничени сè уште се во бегство.
„Во октомври 2024 година, за прв пат откривме нитазени во крвта на лице за кое се верува дека починало од нив“, рече Корин Бетлехем, болнички фармацевт и токсиколог во Еразмус МЦ.
Тестирањето за присуство на нитазен не се спроведува униформно во Холандија.
На западот од земјата, сомнителните смртни случаи често се тестираат, додека во источните региони нема пропишани протоколи, а преживеаните ретко се тестираат.
Извор: vecer.mk
