ФИФА објави дека примила пет милиони барања за билети за Светското првенство во 2026 година во првите 24 часа од третата фаза на продажба. Тоа ја истакнува „извонредната“ глобална побарувачка, и покрај растечките критики од навивачките групи за превисоките цени на билетите, објавува фудбалскиот портал Goal.
Барањата дојдоа од навивачи од повеќе од 200 земји и територии откако продажбата се отвори на почетокот на неделата, што беше и првата можност да се купат билети за одредени натпревари по ждрепката од минатата недела. Турнирот, за потсетување, ќе се одржи во САД, Канада и Мексико од 11 јуни до 17 јули следната година.
ФИФА ги користи бројките како доказ за големиот интерес за првото Светско првенство со 48 национални тимови и не покажува намера да ги преиспита цените и покрај критиките. Навивачките групи низ Европа ја обвинија ФИФА дека ги исклучува обичните навивачи со своите цени, а организацијата Football Supporters Europe (FSE) ги нарече цените „изнудувачки“ и повика на запирање на продажбата додека не се ревидираат.
Просечниот навивач би морал да потроши богатство за да го следи својот тим до финалето, што очекувано предизвика гнев. Како што е наведено, навивачите би морале да издвојат околу 7.000 долари за да го следат својот тим во текот на целиот турнир.
ФИФА откри дека трите земји домаќини ја водеа побарувачката во првите 24 часа, по што следуваат Колумбија, Англија, Еквадор, Бразил, Аргентина, Шкотска, Германија, Австралија, Франција и Панама. Од натпреварите во групната фаза, средбата меѓу Колумбија и Португалија во Мајами на 27 јуни, каде што можеше да се појави и Кристијано Роналдо, генерираше најмногу барања.
Голем интерес има и за натпреварите Бразил – Мароко (Њу Џерси), Мексико – Јужна Кореја (Гвадалахара), Еквадор – Германија (Њу Џерси) и Шкотска – Бразил (Мајами).
Извор: vecer.mk
