„Ова е уникатно и многу посебно откритие. Постојат само 12 такви магнуми, а ова шише е едно од нив“, изјави Томас Розендал Андерсен, раководител на одделот за производство на вино во Брун Расмусен, презентирајќи го ова ретко шише шампањ, според парискиот весник „Ле Фигаро“.
Според него, шишето, кое моментално се чува во приватна винска визба, би можело да привлече и љубители на вино и колекционери кои се желни за кралски сувенири.
„Купувачот би можел да биде класичен колекционер на вино на кого му е забавно да го вклучи ова шише во својата колекција, но и колекционер на кралски предмети поврзани со Леди Дијана“, изјави Розендал Андерсен.
Според него, за овој вид ретко шише алкохол се спроведуваат неколку тестови, вклучително и палење на шишето за да се провери дали содржината има убава, бистра боја.
„Сегашниот сопственик на магнумот, колекционер кој сака да остане анонимен, го купил ова шише од лондонски дилер. На аукција во 2008 година, американската аукциска куќа „Херитиџ аукшнс“ го продала овој магнум за околу 12.000 долари. Ова шише ќе биде понудено повторно на аукција што ќе се одржи на 11 декември во Конгенс Лингби, предградие на Копенхаген“, рече Розендал Андерсен.
Овој шампањ, берба од 1961 година, годината на раѓање на Леди Дијана, е етикетиран за нејзината свадба со принцот Чарлс, која се одржала на 29 јули 1981 година.
Се проценува дека овој магнум Дом Перињон ќе достигне цена помеѓу 500.000 и 600.000 круни (помеѓу 67.000 и 80.000 евра) на аукција.
„Шампањското е целосно питко. Сите шишиња вино што ги продаваме на аукција се тестираат и анализираат однапред“, додаде тој.
Извор: vecer.mk
