Градежните активности за изградба на водоводната мрежа во Љуботен и Љубанци напредуваат со одлична динамика, информира градоначалникот на Општина Бутел, Дарко Костовски. Тој заедно со општинскиот тим денес изврши увид на терен, оценувајќи го проектот како „историски и од огромно значење за жителите на овие две населени места“.
Според Костовски, и покрај сомнежите и постојаните оспорувања од политичките опоненти, проектот веќе е реалност. Во моментов се работи на поставување на цевки на вториот крак од водоводот во насока на резервоарот во Љуботен, а за краток временски период се поставени стотици метри цевковод на два различни делови од трасата.
„Финансирањето за реализација на проектот е обезбедено од Владата на Република Северна Македонија преку Министерството за транспорт и врски, кое додели значителна сума средства за овој капитален проект што ќе им обезбеди чиста и безбедна вода за пиење на жителите преку градскиот водовод на Скопје“, истакна Костовски.
Костовски исто така изрази благодарност до премиерот Христијан Мицкоски, како и до вицепремиерот и министер за транспорт и врски, Александар Николовски, за огромната поддршка во реализацијата на овој исклучително значаен проект за општината и жителите на овој регион.
