Советот на Општина Прилеп на денешната трета седница ги усвои измените и дополнувањата на Буџетот за 2025 година, како и предлог-планот на развојните програми за периодот 2026–2028 година. На дневен ред беше и кварталниот извештај за извршување на буџетот за периодот од 1 јули до 30 септември 2025 година, по што се разви подолга дискусија во која активно учествуваше и градоначалникот Дејан Проданоски.
Со мнозинство гласови, советниците дадоа согласност на тримесечните извештаи за финансиското работење на јавните претпријатија и институции, меѓу кои: ЈП за ПУП – Прилеп, ЈКП „Водовод и канализација“, ЈКП „Комуналец“, ЈКП „Пазари“ и Домот за стари лица „Киро Крстески – Платник“, за периодот од 1 јули до 30 септември 2025 година.
Советниците едногласно ги прифатија и предлог-решенијата за разрешување на членови на надзорни и управни одбори во повеќе институции. Разрешени се членови од надзорниот одбор на ЈКП „Водовод и канализација“, од училишниот одбор на СОУ „Ристе Ристески – Ричко“, како и од управните одбори на ЈКП „Пазари“ и Јавното претпријатие за енергетски дејности „Енерго-Прилеп“.
Дополнително, беше дадена согласност на новиот ценовник на услуги што ЈКП „Водовод и канализација“ ќе ги извршува за потребите на Општина Прилеп, без примена на одредбите од Законот за јавни набавки.
Советот даде поддршка и за кофинансирање на проектот за изработка на техничка документација за постројка за складирање, третман и преработка на биоразградлив и инертен отпад, со што се отвора патот за реализација на значајна иницијатива во областа на управувањето со отпадот.
