По средбата, Брнабиќ изјави дека двете земји имаат повеќе области во кои успешно соработуваат, но дека постои простор таа соработка да биде „уште поинтензивна“.
Таа порача дека Србија ќе ѝ помогне на Украина во процесот на европските интеграции.
– Како што рече господинот Стефанчук, во Народното собрание на Србија формиравме парламентарна група за пријателство со Украина и во редовен контакт сме со колегите од украинската Рада. Се надеваме дека наскоро и нивната група за пријателство ќе ја посети Србија, рече Брнабиќ на заедничката прес-конференција.
Таа истакна дека европските интеграции се заеднички стратешки приоритет на Србија и Украина и дека Белград целосно ја поддржува Украина на нејзиниот пат кон Европската Унија.
– Може да сметате на Србија и нашите експертски тимови. Нашиот министер за европски интеграции, Немања Старовиќ, веќе информираше дека Меморандумот за разбирање меѓу двете земји е финализиран и подготвен за потпишување. Се надевам дека следниот пат ќе учествуваме на церемонијата на потпишување, изјави таа.
Брнабиќ нагласи дека Србија ќе обезбеди стручна и техничка поддршка на Украина во процесот на европските реформи, во духот на пријателски и партнерски односи меѓу двете држави.
– Нашите претседатели, господинот Александар Вучиќ и господинот Володимир Зеленски, имаат одлична комуникација и се во редовен контакт. Последен пат разговараа на 5 ноември. Србија досега обезбеди значајна хуманитарна и финансиска поддршка за Украина, повеќе отколку целиот Западен Балкан заедно, изјави Брнабиќ.
Таа потсети и дека сопругата на претседателот Вучиќ често го посетува Киев, четири пати во изминатите две години, нагласувајќи дека „Украина е пријател на Србија“.
– Посебно ја цениме поддршката што Украина му ја дава на територијалниот интегритет на Србија, како што и Србија го почитува меѓународното право и Повелбата на Обединетите нации, рече Брнабиќ.
Таа оцени дека нејзината посета е знак на континуирано зајакнување на парламентарната и билатералната соработка меѓу Србија и Украина и го покани Стефанчук да ја посети Србија.
– Очекуваме наскоро да го потпишеме Меморандумот за разбирање и соработка во областа на европските интеграции меѓу нашите две влади, додаде Брнабиќ.
Посетата на Брнабиќ на Украина ја соопшти српскиот парламент, наведувајќи дека покрај средбата со Врховната рада, планирани се и други состаноци со највисоки украински државни претставници.
Извор: vecer.mk
