Матурата ни тропа на врата, учениците треба да се подготвуваат. Така што оваа недела би очекувале одговор. Тоа е актуелен проблем и бара брзо решение. Доколку нашето барање не биде исполнето, во тој случај ќе најавиме протест, велат од Организацијата за дијалог и афирмација на средношколците и се оградуваат од денешниот протест на дел од матурантите пред МОН
Организацијата за дијалог и афирмација на средношколците (ОДАС) до Собранието и Владата ќе испрати барање за олеснување на полагањето државна матура за годинашната генерација – или да се скрати обемот на материјалот или да се намали бројот на интерни испити.
Анисија Угриновска, претседателката на ОДАС, вели дека тоа се заклучоци од дискусијата што ја организирале во саботата и ќе бидат пратени до Собранието и Владата, односно Министерството за образование и наука.
„Како организација целиме прво работите да бидат решени преку дискусија, а дури потоа би следувале порадикалните мерки. Бараме намалување на обемот на материјалот предвиден за полагање на матурата или скратување на еден интернет предмет. Тоа се должи на два најголеми фактора во последните четири години – бевме зафатени со корона-кризата и имавме година и пол онлајн настава и дојавите за бомби. Во меѓувреме имаше и други фактори, така што ние матурантите сме најоштетена генерација и не сме имале една целосна непрекината учебна година“,
изјави Угриновска за МИА.
Со оглед дека првиот екстерен испит е закажан за 27 мај и, како што рече, времето ги ограничува, повратен одговор на нивното барање ќе очекуваат оваа недела.
„Матурата ни тропа на врата, учениците треба да се подготвуваат. Така што оваа недела би очекувале одговор. Тоа е актуелен проблем и бара брзо решение. Доколку нашето барање не биде исполнето, во тој случај ќе најавиме протест“,
додаде Угриновска.
Таа се огради од протестот што со вакво барање денеска го одржаа матуранти пред МОН.
Угриновска рече дека тие не се организатори и, веројатно, протестот е самоиницијативен, но дека и ОДАС ќе организира предупредувачки протест доколку надлежните не ги слушнат нивните барања.
По однос на ова барање и во врска со денешниот протест, претседателот на Сојузот на средношколци на Република Северна Македонија, Лука Павиќевиќ, во одговор на новинарско прашање на прес-конференција рече дека во моментов Генералното собрание на ССРСМ нема донесено одлука и дека треба да се разгледаат сите аспекти.
„За една до две недели ќе имаме Генерално собрание кое ќе се произнесе по ова прашање и Сојузот ќе излезе со официјални барања на средношколците за државната матура. Нашите младински амбасадори контактираат секој ден со средношколците од нивните градови, собираме предлози и идеи и ги анализираме. Но, не е прашање само што би сакала една група на средношколци, туку треба да се размислува за сите, бидејќи има повеќе интереси на учениците што се во конфликт – тие што сакаат да се запишат во странство, тие што сакаат да се запишат на студии тука, тие што можеби не ни сакаат да се запишат на факултет. Така што, проблемот околу државната матура е повеќезначен и им повеќе аспекти што треба да се истражат“,
рече Павиќевиќ.
Дел од матурантите денеска излегоа на протест пред Министерството за образование и наука и бараат да им се укине полагањето на матура. Тие велат дека како генерација изминатите години имаат многу изгубено од наставата.
„Првата година беше корона кризата и бевме оставени дома, а неколку месеци немавме и настава. Потоа цела година бевме на онлајн настава и практичната настава се изгуби. Минатата година тргнавме на училиште, но кај професорите имаше многу заболени од корона и се губеа часови. Оваа година немаше редовен јавен превоз за да може навреме да стигнуваме на училиште, а и заради дојавите за бомби, кои се уште ги има, се изгубија многу часови. Сакаме од МОН да ни излезе во пресрет да ни се скрати матурата за да може да си ги оствариме нашите потреби за упис на факултет“,
рекоа матурантите и додадоа дека протестот и неодењето на настава ќе трае сè додека не се исполнат нивните барања.
Според сегашното решение, матурантите полагаат два екстерни и два интерни предмета и проектна задача. Тестот по првиот екстерен испит – мајчин јазик (македонски, албански или турски јазик) и литература е закажан за 27 мај, а на 10 јуни, според календарот на Државниот испитен центар, треба да го полагаат вториот екстерен испит – избор меѓу предметите математика, англиски јазик, француски, германски, руски јазик, филозофија или естетика.
ИЗВОР: 360stepeni.mk
