Градоначалникот на Општина Бутел, Дарко Костовски, кој на 19 октомври го освои вториот мандат како кандидат на ВМРО-ДПМНЕ со поддршка од сите жители на општината без разлика на нивната етничка припадност, соопшти дека градежните работи за изградба на новата детска градинка во Бутел 2 се одвиваат со брзо и ефикасно темпо.
„Со големо задоволство известувам дека изградбата на новата детска градинка во Бутел 2 напредува со одлична динамика. Стариот објект, изграден во 1964 година, беше урнат, а на негово место се издигнува нов, модерен и современ објект за нашите деца“, истакна Костовски.
Според него, новата градинка ќе има површина од 1.800 квадратни метри, со три влеза, седум занимални со спални соби и една модерна сала за јасли. Проектот предвидува и посебна просторија за изолација, просторија за медицинска сестра и кујна за подготовка на храна за децата.
Костовски потенцираше дека објектот ќе има капацитет за 200 деца и ќе ги исполнува сите современи стандарди за згрижување и воспитување на деца од предучилишна возраст.
„Ова е капитален проект кој го реализираме по многу години празни ветувања. За жителите на Бутел 2 ова е најголемата инвестиција досега и доказ дека нашата работа не запира“, додаде Костовски.
Градоначалникот исто така нагласи дека проектот претставува доказ за посветеноста кон модерен и современ Бутел, испраќајќи јасна порака дека продолжува со силен ритам за подобра иднина на сите жители – за новиот Бутел што го градиме заедно!
