АНКАРА (АА) – Туркије ги мобилизира сите институции, персонал и ресурси за подрачјата погодени од разорните земјотреси што ги потресоа јужните области на земјата, изјави вчера претседателот на Туркије, Реџеп Таип Ердоган, известува Анадолу.
„Никој не би требало да се сомнева дека сите средства на државата и нацијата се мобилизирани за зоната погодена од земјотресите“, рече Ердоган за време на посетата на местото Самандаг во турската област Хатај, кое е погодено од земјотресите.
Тој порача дека „ја мобилизирале војската, полицијата, жандармеријата, здравствените работници, персоналот на релевантните институции и сите превозни средства, од авиони до хеликоптери и бродови, за лицата погодени од земјотресите“.
Ердоган нагласи дека не постои земја која може да одговори побргу од Туркије на ваква катастрофа во која бројката на загинати достигна 48.000, а повредени се над 115.000 лица, при што се уништени 50.000 згради.
Претседателот на Туркије рече дека Владата планира да ја заврши изградбата на итно потребните 244.000 станбени единици и 75.000 куќи во рок од една година.
„Во подрачјата погодени од земјотресите досега поставивме 426.000 шатори, за 2 месеци планираме да поставиме 100.000 домови контејнери“, рече претседателот Ердоган.
Повеќе од 13 милиони луѓе во Туркије се погодени од разорните земјотреси што ги потресоа јужните делови на земјата на 6 февруари.
Извор: www.aa.com.tr
