Кандидатот за градоначалник на општина Чаир, Изет Меџити, претстави дел од својот изборен програм посветен на образованието, со цел да се обезбедат еднакви можности за сите ученици во општината.
Според програмата, сите ученици во основните училишта во Чаир ќе добиваат униформи, финансиски обезбедени од буџетот на општината, со што ќе се намали финансиската обврска за семејствата. Исто така, општината ќе ги покрива дневните оброци за учениците од семејства кои примаат социјална помош.
„Никој нема да остане назад. Секое дете ќе има услови да учи, да се храни и да расте со достоинство“, истакна Меџити.
Програмата предвидува и засилување на безбедноста во училиштата, со физички и технолошки мерки во соработка со образовните институции и родителите.
„Ова е Чаир кој го градиме – Чаир на еднаквост, грижа и солидарност. Општина која работи за сите и ги претвора зборовите во дела“, посочи Меџити.
Фокусот, како што додаде, е на инвестиции во иднината – децата, како најважна вредност и иднина на Чаир.
