Кандидатот за градоначалник на Град Скопје, Орце Ѓорѓиевски, денес присуствуваше на одбележувањето на Денот на Македонската академија на науките и уметностите (МАНУ), на покана на претседателот академик Живко Попов.
Ѓорѓиевски изрази чест и задоволство што бил дел од настанот заедно со истакнати претставници на научната заедница од земјата и регионот, со кои разговарал за теми поврзани со иднината на Скопје.
„Македонската академија на науките и уметностите со децении претставува симбол на интелектуалниот и духовниот развој на нацијата. Со својот научен и уметнички интегритет, МАНУ останува чувар на македонскиот јазик, култура, идентитет и соживотот меѓу различните заедници во Македонија“, изјави Ѓорѓиевски.
Тој упати искрени честитки до овогодинешните добитници на меѓународното признание „Блаже Конески“, Емилио Марин и Ивица Баковиќ, и им посака понатамошен успех во нивната работа.
„Честит празник за сите членови и соработници на МАНУ“, додаде Ѓорѓиевски.
