Во општина Бутел започна постапката за тендерирање за изградба на новата модерна поликлиника, голем проект кој ќе ги трансформира здравствените услуги за жителите на оваа општина. Веста ја соопшти градоначалникот на Бутел, Дарко Костовски, воедно и кандидат на ВМРО-ДПМНЕ за втор мандат, кој заедно со министерот за здравство, Азир Алиу, ја информираа јавноста за овој историски чекор.
„Ви ветив и ќе остварам! Ова е историски момент за граѓаните на Бутел. Многу скоро започнуваме со изградба на новата поликлиника“, истакна Костовски, заблагодарувајќи му се на премиерот Христијан Мицкоски за поддршката на овој мега проект.
Новата поликлиника ќе понуди современи услови за широк спектар на здравствени услуги: ординации за општа медицина, педијатрија, гинекологија, невропсихијатрија и физикална медицина. Исто така ќе има кабинет за радиологија со РТГ и ехо, модерен лабораториум, аптека, како и итна медицинска помош и ноќна нега.
Според Костовски, овој проект, предвиден во урбанистичкиот план усвоен на 16 февруари 2024 година, ќе се изгради на локацијата на поранешната стара амбуланта.
Костовски дополнително нагласи дека изградбата ќе започне многу скоро и дека со нетрпение го очекува денот кога ќе се постави камен-темелникот на оваа инвестиција која ќе означи ново поглавје за здравството во Бутел.
