Во општина Теарце започна реконструкцијата на современо мултифункционално спортско игралиште, проект на Министерството за спорт кој има за цел да ја зајакне спортската инфраструктура низ целата држава.
Министерот за спорт, Борко Ристовски, денеска го означи почетокот на работите, истакнувајќи дека новиот спортски комплекс ќе содржи фудбалски терен, терен за кошарка и фитнес зона на отворено – простор достапен за сите генерации.
„Нашата цел е спортот да биде достапен за секого, и во малите и во големите општини. Верувам дека со изградба на вакви игралишта ќе придонесеме физичката активност да стане секојдневна навика и начин на живот“, рече Ристовски.
Во изминатите 15 месеци, Министерството за спорт изгради и обнови повеќе од 30 мултифункционални игралишта низ државата. Програмата продолжува и во следниот период со нови проекти, со јасна цел – спортот да биде достапен за сите граѓани, без разлика во кој град или општина живеат.
