Градоначалникот на Општина Бутел, Дарко Костовски, воедно и кандидат на ВМРО-ДПМНЕ за втор мандат, во јавна изјава го презентираше најновиот проект за изградба на нов Спортско-рекреативен центар во населбата Радишани Горна Зона.
Според него, овој модерен простор ќе се простира на повеќе од 2000 метри квадратни и ќе претставува директна инвестиција во квалитетот на животот на жителите од овој дел.
Што ќе содржи новиот спортски комплекс: модерно фудбалско игралиште со вештачка трева, ЛЕД-осветлување и нова метална ограда, нови трибини со удобни седишта, кошаркарско игралиште со специјална подлога, реконструкција и проширување на детското игралиште со современи реквизити, фитнес-зона за вежбање и рекреација, урбани простори со ново ЛЕД-осветлување.
Костовски изјави дека овој проект претставува конкретен доказ дека Општина Бутел се менува со сигурни чекори кон модернизација. Тој исто така потенцираше дека граѓаните на оваа општина го добиваат она што го заслужуваат – урбана средина со повеќе простори за спорт и рекреација.
„Инвестираме во нашата иднина, во нашите деца и во поквалитетен живот на жителите на Бутел,“ изјави Костовски.
Според Костовски, овој најнов проект е дел од визијата за модерен, урбан Бутел достоен за секој граѓанин.
