ЛШ: Европскиот првак гостува кај Барселона, Елмас и Наполи го чекаат Спортинг

Натпреварот меѓу Барселона и ПСЖ вечерва ќе биде во фокусот на вториот ден од нечевите во 2. коло од лигашката фаза во Лигата на шампионите. Барселона, предводена од Ханси Флик е во врвна форма, води во Ла Лига и влегува во мечот по победа од 2-1 над Њукасл во првата рунда од ЛШ, додека ПСЖ, бранителот на титулата под водство на Луис Енрике, ја започна одбраната на титулата со победа од 4-0 над Аталанта. И двата тима се соочуваат со предизвици со повредите: на Барселона ќе ѝ недостасуваат Рафиња и Жоан Гарсија, додека ПСЖ би можела да биде без Усман Дембеле, Маркињос и неколку играчи од средниот ред. Историски гледано, нивните меѓусебни натпревари се неизвесни, при што секој тим победил на две од последните пет средби, додека еден меч заврши нерешено.

За нас вечерва ќе биде интересно на мечот во Неапол, каде Елиф Елмас и Наполи го пречекуваат Спортинг (Л). Наполи очајно ги посакува своите први бодови по поразот од 2-0 од Манчестер Сити во првиот натпревар. И покрај неодамнешните неуспеси, тие ги добија двата домашни натпревари оваа сезона, со просек од по два гола и имаат европски домашен рекорд: само четири порази на 30 натпревари од Лигата на шампионите.

Ова е првата средба во Лигата на шампионите меѓу Наполи и Спортинг, иако двапати ремизираа 0-0 во Купот на УЕФА 1989/90.

Од останатите дуели Арсенал очекува три бода на дуелот со Олимпијакос, додека Баер (Л) на домашен терен го очекува дуелот со ПСВ. Јувентус е во Шпанија каде ќе му гостува на Виљареал, а, пак, Њукасл оди по прва победа во Белгија кај Ројал Унион.