Полска ноќеска, поради интензивниот напад на Русија со ракети и дронови врз Украина, ги затвори аеродромите во Љублин и Жешув и ги подигна своите и сојузничките борбени авиони, соопшти Оперативната команда на армијата.
Аеродромите во Љублин и Жешув, кои се клучни за транспортот на западната помош за Украина и важни логистички точки за НАТО, остануваат затворени. „Полетаа дежурните парови борбени авиони, а системот за противвоздушна одбрана и радарските системи се ставени во највисока готовност. Овие мерки се превентивни и силите се подготвени за итна реакција“, наведува командата.
По упадот на дваесетина руски дронови во ноќта на 10 септември и по подоцнежните инциденти со руски воени авиони, кај Полјаците расте убедувањето дека армијата треба да реагира и да ги соборува руските летала. Според анкета на порталот Onet.pl, 67% од граѓаните бараат соборување на руските авиони кога ќе го нарушат полскиот воздушен простор, додека само 8,7% сметаат дека не треба да се реагира. Во друга анкета, 74% од испитаниците сметаат дека американскиот претседател Доналд Трамп требало поодлучно да реагира на упадот на дроновите.
Јавноста беше шокирана и од изјавата на украинскиот претседател Володимир Зеленски дека кон Полска биле испратени 92 руски дрона, но поголемиот дел биле соборени над Украина. Белорускиот претседател Александар Лукашенко додаде дека некои дронови навлегле во Полска од територијата на Белорусија.
Дека Полска ќе ги соборува руските авиони и дронови кои ќе навлезат во нејзиниот воздушен простор најавија премиерот Доналд Туск и министерот за надворешни работи Радослав Сикорски. Туск, сепак, нагласи дека одлуката за соборување ќе се носи само ако и сојузниците во НАТО го оценат леталото како закана, а не како грешка или краткотрајна провокација.
Извор: tv21
