Министерката за финансии Гордана Димитриеска-Кочоска оцени дека економските показатели конечно прикажуваат позитивни резултати, а главен двигател на растот е приватниот сектор.
„Податоците за БДП покажуваат дека приватните компании го носат економскиот раст, со особено значајно учество на градежништвото и земјоделството. По години негативни резултати, земјоделството два последователни квартали бележи позитивна динамика, додека градежништвото директно придонесува за инфраструктурниот развој,“ изјави министерката во гостување на ТВ21.
Таа нагласи дека за разлика од минатото, растот денес не зависи од јавната потрошувачка, туку од инвестициите и активностите на приватниот сектор. „Посебно ме радува што приватните компании создаваат нови можности, вложуваат во развој и ја стимулираат продуктивноста,“ додаде Димитриеска-Кочоска.
Министерката истакна дека Владата останува посветена на создавање услови за натамошен развој на приватниот сектор преку поддршка на инвестиции, иновации и нови работни места, како и одржување на фискалната дисциплина.
„Очекуваме позитивната динамика да продолжи и во наредните квартали. Владата ќе остане фокусирана на зацврстување на економските основи и создавање поволна клима за инвестирање,“ рече таа, посочувајќи дека резултатите се поттикнати и од унгарскиот кредит реализиран преку Развојната банка.
