Хасанбег конечно го добива проектот што жителите со години го очекуваа – започна целосната реконструкција на атмосферскиот канал, инвестиција која ќе донесе сигурност, заштита и развој за илјадници жители.
Каналот, долг 1350 метри и широк до 10 метри, ќе обезбеди цврста заштита на населбата од можни поплави. Ова е директен одговор на трагедијата од 2016 година, кога поплавите одзедоа 23 човечки животи и оставија зад себе уништување и длабоки траги.
„Во февруари најавив целосна реконструкција на овој канал. Денес ветувањето станува реалност. Со овој проект, вреден 38 милиони денари, Министерството за животна средина и просторно планирање во соработка со Општина Гази Баба ја докажува важноста на заедничкото дејствување во интерес на граѓаните,“ изјави првиот вицепремиер и министер за животна средина Изет Меџити.
Тој нагласи дека Хасанбег долго време плаќал висока цена поради негрижата и неинвестирањето во минатото, но со овој проект започнува нова ера на сигурност и развој.
„Овој инвестициски зафат е гаранција за животот, за имотот и за иднината на жителите на Хасанбег. Времето на заборав е завршено,“ порача Меџити.
Со реконструкцијата, на жителите им се овозможува крај на стравот и несигурноста, а почеток на стабилност, развој и доверба.
