Под мотото „Комбинирај и движи се“, во Битола се одбележа Европската недела на мобилност, која од 16 до 22 септември се организира во над 2010 градови од 44 држави низ Европа и светот. Годинава темата е „Мобилност за сите“.
Ученици од ООУ „Елпида Караманди“ заедно со своите наставници демонстрираа колку е значајна изградбата на новите велосипедски патеки, кои овозможуваат поголема употреба на велосипедите и зголемена безбедност во сообраќајот, особено за најмладите.
На платото пред Офицерскиот дом, градоначалникот Тони Коњановски им се обрати на учесниците, истакнувајќи ја заложбата на локалната самоуправа за создавање подобра инфраструктура за одржлива мобилност.
„Покрај веќе изградените над 5 километри вело патеки, наскоро ќе добиеме и нова вело инфраструктура, преку која ќе ја зголемиме безбедноста и ќе создадеме услови за поголема употреба на велосипедите и подобра заштита на пешаците,“ рече Коњановски.
Со активностите во Битола, градот уште еднаш ја потврди својата посветеност кон европските иницијативи за почиста животна средина и современи урбани решенија.
