Во Битола беше промовирана програмата Green & Growth, иницијатива на Европската банка за обнова и развој (ЕБОР) и Фондот за чиста технологија, со цел поддршка на зелената економска транзиција во Пелагонискиот и Југозападниот регион на Македонија.
Градоначалникот Тони Коњановски истакна дека Општина Битола веќе активно реализира проекти за енергетска ефикасност и заштита на животната средина и е дел од Зелената агенда за Западниот Балкан и Националната развојна стратегија.
„Верувам дека фондовите од овој финансиски инструмент ќе бидат искористени за инвестиции во зелени и иновативни проекти кои ќе ги зајакнат локалните претпријатија, правејќи ги поотпорни и поконкурентни на домашниот, регионалниот и глобалниот пазар“, рече Коњановски.
Програмата претставува комбиниран финансиски инструмент, кој вклучува финансирање, грантови и техничка помош за мали и средни претпријатија, како и корпорации, со цел поддршка на зелени инвестиции во регионот.
