Во посета на Кабинетот на претседателката на државата Гордана Сиљановска-Давкова биле ученици и наставници од скопските основни училишта „Димитар Поп Георгиев – Беровски“ , „Киро Глигоров“, „11 Октомври“ и од училиштето „Драга Стојаноска“ од село Долно Соње.
Кабинетот на Сиљановска-Давкова соопшти дека гостите со голем интерес ја проследиле свечената церемонија на менување на државното знаме, којашто традиционално се одржува секој втор петок во месецот од страна на Баталјонот за почести при македонската армија.
-Настанот е свечен чин на изразување почит кон македонското знаме, како еден од најважните државни симболи. Учениците изразија голем интерес за претседателската функција и нејзиното извршување. Со искреност и неочекувана зрелост, тие поставија сериозни прашања, небаре возрасни: зошто со децении сме имале само мажи на претседателската функција, дали ќе помогнам во обединувањето, дали ме сакале и дали ми недостигаат студентите, дали сум била одлична ученичка…Но, сакаа да ,,ѕирнат” и во личниот свет на претседателката: нејзиното хоби, омилена книга, филм, љубов кон животните. Претседателката им раскажа за новото милениче, македонското овчарско куче Караман, што неодамна стана дел од нејзиното семејство и им покажа негова фотографија, се наведува во соопштението.
Сиљановска-Давкова ги охрабрила учениците „да учат, да читаат, да веруваат во силата на знаењето, доброто и љубовта, да крититикуваат, но да не навредуваат, да го почитуваат другиот и поинаквиот“.
-Децата ѝ подарија уникатни, рачно изработени подароци и ја поканија да ги посети нивните училишта, соопшти Кабинетот на Сиљановска-Давкова.
Извор: kurir.mk
