Во штипската населба Балканска, во кругот на црквата „Свети Константин и Елена“, вчера беше одбележана 34-годишнината од Независноста на Република Македонија. Настанот започна со поздравни обраќања на повеќе истакнати говорници: претседателот на ЗМЕМ „Мирка Гинова“ од Штип Стојан Димков, градоначалникот на општина Штип Иван Јорданов, претставникот на ОМО „Илинден“ од Пиринскиот дел на Македонија Кирил Тилев, претседателот на Сојузот на Македонците од егејскиот дел и децата бегалци „Македон“ Александар Јаневски и професорката Елка Јачева Улчар.
На свеченоста присуствуваа бројни гости од населбата Балканска и Штип, претставници на сродни здруженија од целата држава, како и градоначалникот на општина Карбинци Виктор Паунов и советникот Никола Костадинов. Настанот го водеше секретарот на ЗМЕМ „Мирка Гинова“ Величе Николова.
Културно-уметничкиот дел беше збогатен со настапи на вокалната уметничка Моника Стојчева, фолклорната група „Русалии“ од Секирник со традиционалниот Танц на сабјата од Кукуш и КУД „Митко Алексов“ од Кочани со сплет ора од Егејскиот дел на Македонија.
ЗМЕМ „Мирка Гинова“ од Штип изрази благодарност до сите присутни, особено до градоначалникот Иван Јорданов за неговата поддршка на активностите на здружението. Посебна благодарност беше упатена и до Лефтер Манче – „дете бегалец“, кој и од Канада дава значаен придонес за зачувување и промоција на македонската култура и традиција.
