Запуштениот спортски базен во Чаир ќе се претвори во современ спортски комплекс по европски стандарди, инвестиција што ќе ја направи горда не само општината, туку и целиот Скопје, најави Изет Меџити, прв вицепремиер и кандидат за градоначалник на Чаир.
Комплексот ќе вклучува голема сала за ракомет, одбојка и кошарка со капацитет од над 3.000 гледачи, како и посебни простории за фитнес, пинг-понг, боречки спортови, карате и бокс. Надворешниот дел ќе содржи терени за мал фудбал и два отворени терени за кошарка, достапни за сите граѓани.
Проектот ќе се реализира преку јавно-приватно партнерство, со гаранција дека по завршување на периодот на користење од инвеститорот, целата спортска зона ќе премине во сопственост на Општина Чаир и граѓаните. Владата веќе му го овозможи на Чаир правото да го менаџира овој простор и да ги спроведе сите потребни процедури.
Со овој проект, децата и младите од Чаир ќе имаат услови споредливи со најсовремените спортски центри во Европа, што претставува голем чекор напред во поддршката на спортот, здравиот живот и рекреацијата.
„Време е Чаир да има слика каква што заслужува – европски Чаир, Чаир на можностите“, истакна Меџити.
