Тие тврдат дека на пакувањето на чоколадото Милка нема јасна индикација дека тежината е намалена од 100 на 90 грама. Тужбата е поднесена во Регионалниот суд во Бремен, објавува весникот Велт.
Во оваа прилика, Армин Валет од Хамбуршкиот центар за советување на потрошувачите се огласи и ги повика законодавците „конечно да воспостават обврзувачки прописи за намалување на содржината на пакувањето“.
Монделез ја намали количината на полнење во чоколадите Милка од 100 грама на 90 грама и во исто време ги зголеми некои од цените, за што компанијата беше жестоко критикувана, а во гласањето на организацијата за потрошувачи Фудвоч, чоколадото Милка беше прогласено за „најочигледна рекламна лага на годината“.
Кон средината на јули, компанијата Монделез објави дека цените и трошоците за купување какао низ целиот синџир на снабдување драстично се зголемиле и дека, за да остане конкурентна, компанијата морала да преземе „добро осмислени мерки“ со кои новата тежина на чоколадните плочки е јасно означена на пакувањето и потрошувачите се информирани на социјалните мрежи.
Новото номинално количество на полнење на производот, отпечатено со мали букви на предната страна од пакувањето, лесно се занемарува и често се крие на полиците во супермаркетите.
„Пакувањето и дизајнот се идентични, а самото чоколадо незабележливо станало потенко за околу еден милиметар. Потрошувачите на тој начин се заведуваат“, предупредува Хамбуршкиот центар за советување на потрошувачите.
„Монделез“ ги негираше обвинувањата, велејќи дека транспарентноста во односот со потрошувачите е врвен приоритет.
„Јасно ја наведуваме новата тежина на пакувањето на нашите производи“, рече портпаролката на компанијата и повтори дека клиентите биле информирани за сè преку социјалните мрежи.
Извор: vecer.mk
