Бујар Османи, кандидат за градоначалник на општина Чаир од редовите на ДУИ, денеска ја објави својата средба со светски познатиот архитект Мишел Ројкинд, неколку часа по јавната средба на неговиот противкандидат Изет Меџити со Бајрам Вардар.
„Денеска со Ројкинд прошетавме низ Чаир. Го слушав внимателно додека ги анализираше улиците, просторот и луѓето. Заедно работиме на визија за урбана преродба на Чаир. Конечно ќе добие долгорочен план за развој и урбанизација“, напиша Османи на социјалните мрежи.
Тој нагласи дека приоритетите што ги издвоил Ројкинд се јавен простор, пристапност, естетика и функционалност. Османи истакна дека Чаир не смее повеќе да се гледа како симбол на хаос и нефункционалност, и дека е подготвен да вложи целата енергија за трансформација на општината.
Средбата следува по примерот на Меџити, кој исто така се сретна со светски познат архитект за развојот на Чаир, а двајцата кандидати настапуваат со свои визии за урбана преродба на општината.
