24
Владата преку новиот предлог-закон за рударство испраќа сигнал дека сака повторно да ја врати оваа индустрија меѓу стратешките гранки на македонската економија.
Според колумнистот Виктор Грозданов, кој за Plusinfo.mk ја анализира новата законска рамка, ваквиот пристап може да отвори нови можности за економски развој и да го ублажи иселувањето на младите.Грозданов објаснува дека Македонија ќе има два одвоени закони – еден за рударството и друг за геологијата. На тој начин, рударството би се третирало како клучна индустрија со јасна регулација и засилена државна контрола.
Новата рамка предвидува строга постапка за сите фази: од геолошки истражувања и еколошки елаборати, до експлоатација и рехабилитација на искористените површини.„Само со јасна регулатива рударството може да стане повторно двигател на економијата и да помогне во спречување на белата чума“, потенцира Грозданов. Тој смета дека во процесот мора да бидат вклучени стручњаци од повеќе области – геолози, рудари, металурзи, економисти и лекари – за да се обезбеди економска одржливост, заштита на здравјето и зачувување на животната средина.
Во својата колумна, Грозданов потсетува и на примерот со хидроцентралата и рибникот на реката Дошница, изградени во 1952 година, каде и денес се мрестат стотици илјади пастрмки. Со тоа, како што вели, се покажува дека не секоја индустриска интервенција значи уништување на природата.Посебен акцент се става и на иднината на рударството без нови хидројаловишни брани. Компаниите „Генезис“ и „Иловица-Штука“ веќе работат на модели за искористување на ретки метали од постоечки јаловишта, што Грозданов го наведува како пример за нов пристап.
Тој најавува и две нови колумни до крајот на август, во кои ќе се осврне на „еко-лажговците“ и нивните политички врски, како и на злоупотребите во управувањето со хидро-системите и рударството.
Извор: zurnal.mk
