2
На граничниот премин „Богородица“ утринава се чека околу 40 минути за излез од државата кон Грција, додека на „Табановце“ времето на чекање изнесува околу половина час, информираат од Автомото сојузот на Македонија (АМСМ).
Од камерите на Јавното претпријатие за државни патишта се гледа дека на „Богородица“ се формирале шест колони возила кои чекаат за излез. На останатите гранични премини нема подолги задржувања ниту за влез, ниту за излез од државата.
АМСМ предупредува дека поради летните одмори се зголемила фреквенцијата на возила, но сообраќајот на државните патишта се одвива непречено, по суви коловози, со зголемен интензитет на патиштата надвор од градските средини.
Се препорачува возачите да ја прилагодат брзината на движење, да ја почитуваат поставената сообраќајна сигнализација и да управуваат внимателно на патиштата низ котлините, речните долини и клисурите, каде постои ризик од одрони. Особено внимание се советува на делниците Катланово – Велес, Маврово – Дебар – Струга, Виница – Берово и Кочани – Делчево.
Извор: zurnal.mk
