Трамп на виртуелен самит со Зеленски и лидерите на ЕУ – Путин во телефонски разговор со Ким Џонг Ун. Пред средбата во петок на Алјаска, Вашингтон и Москва прават шаховски политички потези – експертите скептични, ЕУ повикува на фер договор.
Откако Трамп порача дека и Русија и Украина ќе мора да се откажат од дел од територија во интерес на мировен договор, што беше отфрлено од Зеленски, денеска преку видео врска американскиот претседател разговара со украинскиот претседател, лидерите на Унијата и генералниот секретар на НАТО. Кратко пред почетокот на самитот, Трамп на социјалните мрежи порача…
Доналд Трамп претседател на САД – За кратко време ќе разговарам со европските лидери. Тие се одлични луѓе кои сакаат да видат постигнат договор.
А Зеленски пристигна во Берлин – слета со хеликоптер пред канцеларијата на канцеларот, каде лично го пречека Мерц, заедно во обид да ги намалат стравувањата дека Путин ќе издејствува дипломатска победа над Трамп во петок. Зеленски очекува да се изврши притисок врз Русија.
Володимир Зеленски претседател на Украина – Искуството на Украина и на нашите партнери мора да се искористи за да се спречи измама од страна на Русија. Во моментов, нема знаци дека Русите се подготвуваат да ја завршат војната. Нашите координирани напори и заеднички акции – на Украина, САД, Европа и сите земји што бараат мир – дефинитивно можат да ја принудат Русија да склучи мир.
Шефицата на европската дипломатија Калас, пак, изјави дека Путин нема намера да преговара ниту да ја заврши војната, туку сака да ги одложи санкциите кон Москва и да се фотографира со Трамп.
И додека повеќето аналитичари испраќаат пораки дека не очекуваат да се случи чудо во Алјаска, Трамп денеска на социјалните мрежи им порача дека се , како што кажа – отпуштени губитници и глупави луѓе кои шират лажни вести.
Во меѓувреме Москва објави дека украинските сили планирале саботажа, а вината би ја префрлиле на Русија – со цел да се минира средбата во петок.
Извор: 24vesti.mk
