Балканот под инфлаторен бран – во дел од земјите на ЕУ инфлацијата е под контрола, се очекува да биде 2%

Балканот освен по високи температури и по пожари, летово ќе го памети и по забрзување на инфлацијата. Скоро во сите земји од регионот таа има нагорна линија. Според податоците и проценките, во моментов највисока инфлација има во Македонија.

Ние во јули имавме годишна инфлација од 4,8 насто, но тука некаде се и Србија и Босна и Херцеговина со 4,6 отсто, Хрватска со 4,5, Косово со 4,3 и Црна Гора со 4,2.

Но за добар дел од земјите, за Србија, Босна и Херцеговина, Косово, Црна Гора и  Албанија податоците се за јуни, додека за Македонија за јули. За Грција, Словенија и Хрватска, е проценка за јули.

Исто така, кај земјите од регионот кои се дел од Европската Унија, инфлацијата поизразено забрзува, додека кај останатите кои не се на Балканот или е на нивото на претходните месеци или незначително расте. Сепак, исклучок е Естонија која има рекордно висока инфлација од 5,6 насто. Ова се должи на зголемувањето на Данокот на додадена вредност и на акцизите за тутун и алкохол.

Но, во добар дел од земјите, пред се во Германија, Белгија и Холандија таа забавува, додека во Франција и Италија нема промена. Во овие две земји, како и во Германија инфлацијата е под просекот во Еврозоната која изнесува 2 отсто.

Инаку, заедничко за Словенија, Хрватска и Грција е што инфлацијата се зголемува поради летната сезона и поскапите услуги, како туризам, сместување и угостителство. Кај Грција и Словенија дополнително влијае цената на електричната енергија, додека во Хрватска дополнителен подгревач на инфлацијата во јули е цената на храната.

И Македонија, според Народната банка има слични причини за повисока инфлација.

„Како што забележавме од податоците во јуни, единствено се сега концентрирани на домашните фактори, домашната побарувачка, која што притиска на растот на цените и на цените на храната.“, вели Трајко Славески.

И од Институтот за економски истражувања и политики „Фајнанс Тинк“ сметаат дека домашната побарувачка диктирана од потрошувачката на граѓаните е главна причина за забрзување на инфлацијата, а не дека е цената на храната, иако таа значително расте во јули. Сепак ако се погледне структурата на поскапувањето на храната, најмногу цените пораснале на овошјето како и кај рибата и морските плодови, додека кај другите производи има незначително зголемување или намалување.