ДАМАСК (АА) – Сириската влада донесе одлука да не присуствува на следната рунда разговори планирани во Париз, Франција, опишувајќи ја наводната конференција на североистокот од земјата организирана од терористичката организација ПКК/ЈПГ, која во Сирија го користи името СДС, како „спротивна на националното единство“ и „кршење на Договорот од 10 март“, известува Анадолу.
Владин претставник во разговор за сириската официјална новинска агенција САНА изјави дека нема да застанат на страната на „ниту еден сојуз што се стреми да ја оживее ерата на соборениот режим“ и нема да учествуваат во нови разговори со Сириските демократски сили (СДС).
Службеникот нагласи дека споменатата конференција го поткопала тековниот процес на преговори и дека СДС мора да заземе сериозен став според Договорот од 10 март.
Тој изјави дека Дамаск е „легитимна адреса“ за преговорите, додавајќи дека случувањата на североистокот од земјата не претставуваат национална волја што ја опфаќа цела Сирија.
Опишувајќи го сојузот на североисток како „кревко партнерство на оние што имаат загуба од победата на сирискиот народ“, владиниот претставник смета дека да се биде домаќин на сепаратистички личности е јасно кршење на Договорот од 10 март.
Тој наведе дека категорично го отфрлаат наметнувањето на каква било визија во врска за структурата на државата преку сила или оружје, нагласувајќи дека оваа структура може да се утврди само преку траен устав и народен референдум со учество на сите Сиријци.
Друг владин функционер кој претходно зборуваше за Агенција Анадолу (AA) изјави дека на маса се сите опции, вклучително и откажување на Преговорите во Париз.
Терористичката организација ПКК/ЈПГ, која го користи името СДС во Сирија, вчера одржа таканаречена конференција во покраината Хасаке, на која присуствуваа друзскиот лидер Хикмет ал-Хаџри од Сувејда, Газал Газа, претседател на Врховниот совет на Алавитите, и курдскиот „религиозен лидер“ Муршид Машук Хазневи, поддржувач на СДС, барајќи „децентрализирана“ држава.
На 10 март, сириското претседателство објави потпишување на договор за интегрирање на СДС во државните институции, потврдувајќи го територијалното единство на земјата и отфрлајќи ги сите обиди за поделба.
Сириското Министерство за надворешни работи објави дека следната рунда консултации „за целосно спроведување“ на договорот од 10 март ќе се одржи во Париз „што е можно поскоро“.
Извор: Anadolu Agency (AA)
