Коалицијата ВЛЕН денеска во Гостивар го претстави Себаедин Даут како свој кандидат за градоначалник на претстојните локални избори во октомври.
Од ВЛЕН порачаа дека со оваа одлука го нудат „најдостојниот кандидат“ и ја гарантираат изборната победа во секој дел од градот.
Даут, роден и израснат во Гостивар, е дипломиран правник на Универзитетот во Приштина и има богато искуство во правосудството и јавната безбедност. Бил судија и претседател на Основниот суд во Гостивар, како и носител на значајни функции во Министерството за внатрешни работи и безбедносните структури. Последната деценија работи како нотар.
Од партијата истакнаа дека Даут е познат по својата чесност, отвореност во комуникацијата и способност да обединува различни општествени групи, ветувајќи дека со него на чело, Гостивар ќе добие транспарентно, одговорно и визионерско раководство.
