Денес беше поставен споменикот на македонскиот војвода Александар Турунџев на новоизградениот кружен тек кај Ат-пазар во Битола, на местото каде што војводата бил обесен пред 120 години.
Градоначалникот на Општина Битола, Тони Коњановски, ја истакна важноста на овој чин, нагласувајќи дека со тоа Битола му оддава вистинска почит на еден од своите историски херои.
„Со изградбата на кружниот тек и поставувањето на споменикот на Александар Турунџев, правиме историска и морална исправка. Конечно, споменикот добива достојно место, таму каде што му е и местото – на самиот локалитет каде што е измачуван и убиен војводата“, изјави Коњановски.
Споменикот беше изработен пред осум години, откако во 2015 година беше донесена одлуката за негово подигнување. Но, поради инфраструктурни пречки, истиот досега стоеше во општинскиот двор.
Со заложбата на градоначалникот и локалната самоуправа, кружниот тек кај ветеринарната станица е веќе изграден, а во наредните денови ќе се изведуваат завршните работи на постаментот и хортикултурно уредување на просторот.
Планирано е до 30 август, на 120-годишнината од смртта на Турунџев, просторот да биде целосно уреден и официјално откриен.
