Дваесет нови сезонски пожарникари во Битола успешно ја завршија обуката за справување со пожари и укажување прва помош, во рамките на мерката 6.2 од Оперативниот план за вработување за 2025 година. Обуката е дел од проект кој се реализира низ 13 општини, со вкупно 364 кандидати на државно ниво.
Градоначалникот на Битола, Тони Коњановски, ги посети учесниците за време на нивната обука и упати поддршка, охрабрување и благодарност за нивната подготвеност да се вклучат во заштитата на населението и природата. Тој истакна дека локалната самоуправа ќе продолжи со вложувања во ТППЕ Битола преку доопремување на новата противпожарна станица, како и преку подготовка на дополнителен стручен кадар.
Програмата се реализира во соработка со Дирекцијата за заштита и спасување, Агенцијата за вработување, Противпожарниот сојуз, Црвениот крст, општините и територијалните противпожарни единици. Во Битола, кандидатите минаа низ теоретска обука, практични вежби на терен и тренинг за прва помош.
По завршување на обуката, следува склучување договори и распределба на пожарникарите во рамки на локалните противпожарни единици. Новите кадри ќе бидат важен ресурс за зголемување на капацитетите за справување со пожари, но и за јакнење на безбедноста и отпорноста на локалната заедница.
