Градоначалникот на Општина Бутел, Дарко Костовски, денеска соопшти дека го потпишал одобрението за изградба на водоводната мрежа во селата Љуботен и Љубанци – еден од најзначајните проекти за општината и жителите на овие две населени места.
Според Костовски, утре Министерството за транспорт ќе распише јавен повик за избор на изведувач на градежните работи.
„Многу скоро почнуваме со работа!“, напиша Костовски на својот профил на Facebook, додавајќи дека ова е еден од неговите најдраги проекти од моментот кога ја доби довербата на граѓаните.
Градоначалникот Костовски ја потенцираше важноста на проектот за задоволување на основната потреба на жителите, истовремено нагласувајќи ги и големите технички и институционални предизвици кои биле надминати во текот на процесот.
На крајот, Костовски изрази благодарност до премиерот Христијан Мицкоски и до вицепремиерот и министер за транспорт, Александар Николовски, за нивната поддршка и блиска соработка во реализацијата на овој проект.
