Во духот на општествената одговорност и грижата за пациентите, АД МЕПСО донираше 2.767.500 денари на ЈЗУ Специјалната болница за гинекологија и акушерство „Мајка Тереза“ во скопската општина Чаир. Со овие средства, болницата набави нов, модерен ехо апарат за подобрување на дијагностиката кај бремените жени и жените со гинеколошки проблеми.
„Одлуката за донација ја донесовме како дел од нашата посветеност кон здравството и поддршката на граѓаните. Ова не е само збор на хартија, туку конкретна акција што го подобрува животот на луѓето“, изјави генералниот директор на АД МЕПСО, доц. д-р Бурим Љатифи, при денешната посета на болницата.
Од болницата информираа дека вкупната вредност на апаратот изнесува над 3,5 милиони денари, при што останатиот дел од средствата – околу 800 илјади денари – се обезбедени од сопствениот буџет на установата.
Оваа донација претставува значаен чекор во унапредувањето на здравствените услуги и директно придонесува за поквалитетна грижа за женското здравје.
