Малите грчки острови Пакси и Итака во Јонското море, размислуваат за можноста да побараат воведување специјална такса за еднодневни посети на туристите поради прекумерниот туризам, следејќи го примерот на островот Сими, пишува грчкиот весник „Катимерини“, јави дописничката на МИА од Атина.
Градоначалникот на Сими, малиот остров во непосредна близина на Родос и на турското крајбрежје, минатиот месец побарал дозвола од Министерството за внатрешни работи на Грција да воведе такса од три евра за посетителите што доаѓаат на еден ден, а овој пример можно е да го следат и Пакси и Итака.
„Катимерини“ пишува дека градоначалниците на двата острови ја чекаат разврската на иницијативата на Сими, а потоа ќе ги донесат и нивните одлуки.
Градоначалникот на Пакси Спиридон Влахопулос за весникот рекол дека доколку Владата, преку Министерството за внатрешни работи дозволи да се воведе ваква такса, тогаш е подготвен конкретното прашање да го покрене и на состанокот на општинскиот совет за да се донесе одлука.
Од друга страна, градоначалникот на Итака, Дионисис Станицас посочил дека на крајот од сезоната ќе се оцени конкретната можност.
Пакси, Итака, како и Сими се мали острови со 2.500 – 3.000 жители, а секоја година се соочуваат со огромен број туристи, а евентуалното воведување такса за туристите кои на еден ден пристигнуваат на островите без да преноќат, би имало за цел зајакнување на основните услуги на островите.
Извор: kurir.mk
