Македонскиот фудбал влегува во нова, модерна ера. Од сезоната 2025/26, Првата македонска фудбалска лига ќе добие ВАР технологија, што значително ќе го подобри квалитетот и регуларноста на натпреварите.
Како што беше најавено од претседателот на Фудбалската федерација на Македонија, Масар Омерагиќ, воведувањето на ВАР системот е реализација на едно од клучните ветувања и чекор напред во дигитализацијата и професионализацијата на македонскиот клупски фудбал.
На денешната презентација, беа покажани техничките и оперативни капацитети на новите ВАР простории, кои ќе бидат целосно функционални веќе од петок, 8 август, кога започнува и новата сезона во Првата МФЛ.
Со ова, македонските клубови ќе добијат дополнителна сигурност при одлуките на теренот, а фокусот ќе биде ставен на фер-плеј и елиминирање на грубите судиски пропусти кои досега често беа во центарот на контроверзии.
ФФМ најави дека сите судии и ВАР оператори се веќе обучени и сертифицирани за работа со системот, а имплементацијата ќе се врши согласно протоколите на УЕФА и ФИФА.
Македонскиот фудбал од петок влегува во ново време – време на поголема прецизност, доверба и транспарентност.
